ددسۇ مالىمەتتەرىنە سايكەس الەمدە ءاربىر بەسىنشى ەرەسەك ادامدا جوعارى قان قىسىمى بار. بۇل سوڭى قازامەن اياقتالاتىن ينسۋلت پەن جۇرەك اۋرۋلارىنىڭ جارتىسىنان استامىنا سەبەپشى بولىپ تابىلادى.
الەۋمەتتىك جوبا اياسىندا قاجەت دەپ تاپقاندار قان قىسىمىن ولشەپ, حولەستەرين دەڭگەيىن انىقتاپ, دارىگەرلەردەن كەڭەس الدى. بۇل باستاما كۇرەتامىر گيپەرتونياسىن, جۇرەك اۋرۋلارىن دياگنوستيكالاۋ مەن ەمدەۋدىڭ, الدىن الۋدىڭ زاماناۋي تاسىلدەرىنەن حالىقتىڭ حاباردارلىعىن كوتەرۋگە باعىتتالدى.
ەمحانا دارىگەرلەرىنىڭ قاتىسۋىمەن وتكىزىلگەن جەدەل سكرينينگتەر اتىراۋ, ورال, شىمكەنت, اقتوبە, قاراعاندى, ساران, رۋدنىي قالالارىندا ۇيىمداستىرىلدى.
سكرينينگتەن وتكەندەردىڭ قان قىسىمى 120/80 مم قۇرايتىن قالىپتى دەڭگەيدەن اۋىتقىعان جاعدايدا, قاتىسۋشىلار سول جەردە دارىگەردەن كەڭەس الا الدى. سونداي-اق, ەمدەلۋگە قاتىستى كەڭەستەرمەن بىرگە, كۇرەتاتامىر گيپەرتونياسىنا شالدىقتىراتىن سەبەپتەر مەن ونىڭ قاۋىپتى سالدارى جونىندە بۇكتەمە پاراقشالار تاراتىلدى.
«كومپانيانىڭ ء«ومىر ىرعاعى» جوباسى جۇرەك-قانتامىر جۇيەسىندەگى اۋرۋلاردى دەر كەزىندە انىقتاپ, تۇراقتى ەمدەلىپ تۇرۋدىڭ ماڭىزدىلىعىنا جۇرتتىڭ نازارىن اۋدارۋعا باعىتتالعان. قازىردىڭ وزىندە جوباعا مىڭنان اسا ادام قاتىسىپ ۇلگەردى. مۇنداي جەدەل سكرينينگتەر حالىقتىڭ ءوز دەنساۋلىعىن ويلاپ, قاجەت بولعان جاعدايدا ءتيىستى ەم-دومدى قابىلداۋعا سەپتەسەتىنىنە سەنىمدىمىن», – دەدى SANTO كومپانياسىنىڭ قوعاممەن بايلانىس جونىندەگى ديرەكتورى ەلەنا ارىشەۆا.
ستاتيستيكاعا سەنسەك, قازاقستاندا بۇل وزەكتى ماسەلەگە اينالعان. ەلىمىزدىڭ ەرەسەك تۇرعىندارى اراسىنداعى كۇرەتامىر گيپەرتەنزياسىنىڭ تارالۋ كەڭدىگى 49,8 پايىزدى قۇرايدى. وسى تۇستا جۇرەك-قانتامىر جۇيەسىمەن بايلانىستى قاۋىپ فاكتورلارى جايىندا تەك 25 پايىزى عانا بىلەتىنىن اتاپ وتكەن ءجون. ونىڭ ۇستىنە دارىگەرلەر گيپەرتەنزياعا قارسى پرەپاراتتاردى تۇراقتى تۇردە گيپەرتونياعا شالدىققانداردىڭ تەك 27 پايىزى عانا قابىلدايتىندىعىن العا تارتادى. ولاردىڭ ىشىندە 22 پايىزى عانا ماقساتتى كورسەتكىشكە قول جەتكىزىپ, قان قىسىمىن رەتەپ وتىرادى ەكەن.
وسى رەتتە قان قىسىمىنىڭ دەڭگەيى جانە جۇرەك-قانتامىر جۇيەسىندەگى اۋرۋلار اراسىندا ءوزارا بايلانىس بار ەكەندىگى دالەدەنگەن, ال بۇل جاعدايدىڭ ادام قازاسىنا اكەلەتىنى دە سيرەك ەمەس. كۇرەتامىر گيپەرتەنزياسىنا اكەلەتىن فاكتورلارعا گەنەتيكالىق بەيىمدىلىك, قانت ديابەتى, ياعني سۋسامىر, سەمىزدىك, بۇيرەك اۋرۋلارى, اس تۇزىن, ىشىمدىكتى شەكتەن تىس تۇتىنۋ, شىلىم شەگۋ, كۇيزەلىس, از قيمىلداۋ جاتادى. وسىنداي فاكتورلاردىڭ ورتاق اسەرىمەن كۇرەتامىر گيپەرتەنزياسى داميدى. جوعارى قان قىسىمىن ەمدەمەسە نەمەسە وعان ءمان بەرمەسە, ونىڭ سالدارى نە ينفراكت, نە مي ينسۋلتى, نە بۇيرەك قىزمەتىنىڭ جەتىسپەۋشىلىگىنە اكەلۋى مۇمكىن. كۇرەتامىر گيپەرتەنزياسىنىڭ «بىلدىرمەي جان العىش» دەگەن اتقا يە بولعانى دا وسىمەن بايلانىستى.
جەدەل سكرينينگتەر كەزىندە گيپەرتونياعا شالدىققان ادامداردى عانا ەمەس, سونىمەن بىرگە, ونىڭ كۇردەلى اۋرۋ ەكەندىگى, ونى دەر كەزىندە ەمدەمەسە سوڭعى قايعىمەن اياقتالاتىنى تۋرالى مالىمەت بەرىلىپ, ءاربىر ادام ءوز قان قىسىمىن باقىلاپ ءجۇرۋى ءۇشىن قاجەتتى داعدىلار ۇيرەتىلىپ, قان قىسىمى تەگىن ولشەندى. سونىمەن بىرگە, پروفيلاكتيكالىق شارالاردى قابىلداۋ, سالاۋاتتى ءومىر سالتىن ۇستانۋ جانە دۇرىس تاماقتانۋدىڭ ماڭىزدىلىعى جونىندە جۇرتشىلىقتىڭ پىكىرىن قالىپتاستىرۋعا جاعداي جاسالدى.
ايناش ەسالي,
«ەگەمەن قازاقستان».
الماتى
